布甸狗My Melody凍冰冰水樽!7-Eleven x Sanrio儲印花換領

天氣愈來愈熱,7-Eleven最新一轉的印花禮品都同消暑解熱有關,再次聯同Sanrio分別推出兩款Chill凍冰冰水樽、兩款普通水樽,仲有夏天對抗落雨之寶-斗篷雨衣,配上布甸狗、My Melody、Hello Kitty同Little Twin Star設計,非常可愛。

撰文:祥 圖片:7-Eleven官方圖片

7-Eleven x Sanrio:布甸狗My Melody凍冰冰水樽

今次7仔儲印花換的,有布甸狗及My Melody造型的Chill凍冰冰水樽,好用在於水樽內有一個儲水芯,注入水之後放入冰格雪成冰棒,而水樽可以注入喜愛的飲品,到出外時可以隨時飲到凍冰冰的飲品。

只要拆除棒芯,其實水樽同一般的水樽無分別。不過如果大家要加入棒芯的話,水樽就要預少一點的飲品量,大概只有430毫升,即是一包大包紙盒裝飲品多少少,應該都夠用的。

而另一個是My Melody設計,同樣都是由水樽加棒芯組成,只要雪好棒芯就可以出街飲凍飲,正!

 

Hello Kitty & Little Twin Stars水樽

如果論外型靚,其實以上兩款的設計都好像不及以下兩款靚,分別以Hello Kitty及Little Twin Stars設計的透明水樽,樽蓋有Hello Kitty的蝴蝶結或Little Twin Stars的星星,蓋下有一個茶隔,放入茶葉沖茶飲。

Sanrio家族斗篷雨衣

夏天除了熱,時常落大雨都是一件煩到震的事,如果你時常使用較為大的手袋,不妨放定一個可以收摺得非常細小的雨衣。今之7仔聯乘Sanrio除了水樽,都推出一款手提袋及斗篷雨衣,圖案都以Sanrio家族的部分角色為設計,包括有Little Twin Star及Hello Kitty等,其中斗篷非常實用,打開後足足有99cm高,小朋友及女士都穿得上。

Sanrio characters 限量版水樽換購詳情:

2018 年 5 月 9 日早上 7 時至 2018 年 6 月 19 日,憑 5 個印花加$42 可隨機換購 Sanrio characters 限量版水樽一款,數量有限換完即止,換罄後不設預訂。

Sanrio Go Around 手提袋換購詳情:

由2018 年 5 月 9 日早上 7 時至 2018 年 6 月 19 日,購買產品加$99 換購 Sanrio Go Around 手提袋一個。

Sanrio 斗篷雨衣換購詳情:

2018 年 5 月 16 日早上 7 時至 2018 年 6 月 19 日,可購買產品加$129 換購 Sanrio 斗篷雨衣一件。

你又點睇?

更多精選內容