GHS New Year Concert 2018_12

【唱出感動】德望合唱團新年音樂會

細囡 Kassy 有份參與學校合唱團的新年音樂會,身為媽媽,當然要帶埋大囡 Keicy 一齊去捧場啦!聽完之後,我「耳朵懷孕了」!

好多人都知道德望合唱團係學界音樂比賽嘅常客,歷年獲奬無數,所以非常期待佢哋呢個為期兩日嘅年度大型表演,結果除咗聽到多首名曲,享受一次音樂盛宴外,更被佢哋嘅精彩演出同團結精神感動。

每一位參與嘅老師同中小幼 Hopers,喺聖誕新年假期期間,幾乎每日都返學校排練,憑住專注同團結,最後喺舞台上唱出高水準,震撼台下每一位聽眾,唱完之後,所有成員都相擁流淚,除咗情感宣洩,相信亦係畀自己同團員嘅投入所感動。

點解我知道?


除咗今年 K3 嘅 Kassy 係合唱團成員,兩年前 Keicy 讀 K3 嘅時候,仲有本人那些年喺小學部嘅時候,都好幸運曾經係學校合唱團成員。

細細個每次放咗學去合唱團,都經常見到中學部嘅姐姐排練,佢哋好多都唱得超好聽,次次都睇到我目定口呆,更幻想有朝一日,可以同佢哋一樣踏上舞台,唱出天籟之音……

更多精選內容