有心機親子學校旅行

當日朝早喺學校集合，一齊坐旅遊巴出發，大家喺車上面唱吓歌，玩吓遊戲，好快就到咗喇！

首先係參觀農地，Par Par 見到有一大片綠色嘅植物，好興奮，即刻走埋去仔細睇吓，現在嘅叔叔話：「唔好以為係植物，估吓係咩嚟？」

佢掘吓啲泥土，三兩吓手勢，一掹，原來係一條紅蘿蔔嚟呀！Par Par 即刻嘩咗一聲！真係好有趣，相信 Par Par 以後見到呢個外型嘅葉，會即刻諗起呢次經歷，知道紅蘿蔔原來係咁樣樣嘅。

掘完紅蘿蔔，跟住去參觀種植場，要特別介紹嗰度嘅無花果，因為啲無花果係專門供應畀四季酒店，係高檔食材嚟呀！而且種植場裡面其他蔬菜都係有機嘅，一定好好味！

點解？Par Par 同我都食過囉！

原來種植場裡面嘅農作物，全部都係跟住落嚟整 pizza 嘅有機食材，Par Par DIY 得好開心呀！

而且焗 pizza 嗰個爐，係四季酒店同款，啲香氣好遠都聞到！

自己 DIY 嘅 pizza，加埋無敵嘅大自然景色，簡直係超豪華美食呀！

除此之外，呢度嘅三文治都超好食，全部都係自家製有機材料啦，當然亦都係我哋自己 DIY 啦！我自己最鍾意食佢嘅素火腿！而細佬就最鍾意食菜，因為好甜，食完仲去攞多啲菜食！^^

有一個抵讚嘅細心位：用紫菜包住個三文治。

平時小朋友食三文治好甩漏，啲餡呀、汁呀會跌曬出嚟，所以農場教小朋友親手用一大塊嘅紫菜包住個三文治嚟食，真係好細心，我第一次見 Par Par 食三文治食得咁乾淨呀！XD

咦？食用花檸檬水？好似好正咁喎！

原來啲大廚都有用佢哋嚟整嘢食㗎！

我哋仲可以親手種食用花，小朋友用手搓泥土嘅時候，所以訓練小肌肉，而且泥土可以抗抑鬱，啱晒大壓力嘅小朋友！現時好多小朋友細細個就要做唔少功課，又未必夠休息，所以建議佢哋嚟用手搓泥土，等啲負能量或者一啲唔開心嘅情緒，可以通過接觸泥土，抒發出嚟。

啲有機蔬菜好靚，買啲返去煮餸先！

跟住係 Par Par 其中一個最鍾意嘅活動：睇動物！

嗰度有啲兔仔同一隻豬，小朋友可以攞啲蔬菜去探佢哋，Par Par仲餵兔仔食嘢㖭！細佬同我講：「原來兔仔食嘢係好慢，真係食得好斯文。」

唔知 Par Par 會唔會學兔仔食嘢呢？XD

餵完啲小動物，帶佢去洗手間，見到呢度洗手間嘅牌，係用粉筆好細心咁畫，真係好有校園嘅親切感。

農場有做垃圾分類，所以大家揼垃圾嘅時候，都要做多一小步，分返啲垃圾去揼，呢個小舉動，亦都令 Par Par 學識咗環保係要由自己做起，要保護我哋呢個美麗嘅大自然。

點樣可以隨時都見到美麗嘅大自然呢？自己 DIY 一個啦！

農場有風乾咗嘅花花、樹葉靚靚標本，可以用嚟 DIY 鎖匙扣，Par Par 好鍾意呀！

除此之外，呢度有一個攤位印象好深刻，伸隻手入去泥土裡面，會攞到蛋蛋，打開之後，會好似 surprise egg 咁，有驚喜禮物。

現場仲有好靚嘅樹葉畫。

和藹可親嘅文娜雅拔幼稚園 Ms. ChiChi 校長，同 Par Par 及一眾小朋友一齊影相留念。

呢次學校旅行，唔止 Par Par 玩得開心兼學習到環保知識，我自己都覺得好 relax，所以無論大人定係小朋友，只要喺都市生活，都需要間中返到大自然嘅懷抱，充充電，再繼續前行。

同時亦都見到，喺屋企做開細佬嘅 Par Par，升咗 K1 之後，開始識得照顧更細個嘅弟弟妹妹，會主動問身邊讀緊嘅 PN 同學「要唔要飲嘢？」、「幫你攞住吖？」，開始成為一位暖男！XD

FB: KeicyKK