爸爸媽媽可以為早產BB做D咩?

專欄

廣告

每個父母都希望自己BB健健康康,可以俾哂最好嘅嘢佢哋。但係如果BB心急早咗出世,我哋又可以做D咩呢?

現今,早產BB一出世,都會有醫院嘅專業醫護人員盡力照顧,但係好多時父母就會有一種無奈,因為佢哋明明好想親自照顧BB但係又被迫同BB分開,有時真係唔知自己可以為BB做D咩。

希望藉住我對嬰兒按摩嘅認識,可以俾D有關呢方面嘅資訊你。

嬰兒按摩對BB好就好多人都知,你又知唔知原來對早產嬰兒都有幫助呢?

外國有硏究顯示通過嬰兒按摩可以幫助BB增重,〈可參考: http://www.ncbi.nlm.nih.gov/pmc/articles/PMC2844909/ ),換句話說,BB快D足磅,係可提早出院時間,而且可以促進BB身體器官發展。而且唯一可以幫BB做呢樣咁重要嘅工作嘅人就只有父母。無人能夠替代到父母親手做嘅效果。

BB會聞得出爸爸媽媽熟識嘅氣味、皮膚嘅溫度及觸感,每一下接觸都俾到BB無限嘅支持。所以,若果你嘅BB心急見爸爸媽媽,早咗出世,爸爸媽媽係可以用自己雙手去將愛同支持傳俾BB,俾更多嘅力量佢去長大!

喺外國,例如澳洲、瑞典呢D地方,佢地嘅醫院除咗一般醫護人員,佢哋仲有一個部門叫NIDCAP (Newborn Individualized Developmental Care and Assessment Program),佢哋嘅其中一個作用係喺醫院中觀察新生嬰兒嘅情況,為父母及家人給予關心及支持,而NIDCAP係需要經過深入培訓。我之前深造過嘅其中一個有關嬰兒按摩嘅課程「早產嬰兒按摩課程」,我嘅老師嚟自瑞典,佢分享咗喺佢哋嘅醫院除咗NIDCAP之外,嬰兒按摩導師都可以喺醫院出入,為一D有需要嘅父母提供意見、推廣嬰兒按摩,甚至教父母幫BB做按摩。 而且當地人都非常接受為早產BB按摩,可以話係好普遍。

不過,喺香港喺呢人方面比較保守,而且醫院人流比外國嘅多,現階段,父母未必可以好快咁接觸到呢一類型嘅support。希望有一日可以發展到外國咁,可以俾到父母多d support,而家只可以藉住我自己把口,多D同身邊嘅朋友SHARE,希望可以等多d人認識同了解呢樣嘢。

**不過大家記住,早產嬰兒喺醫院並不可以自由活動,佢哋身上可能有好多儀器,而且佢哋發育未完成,所以不適合一般嘅按摩,家長如果想嘗試,一定要請教有關人仕嘅專業意見,以免適得其反。有興趣想知多D有關呢方面嘅資訊,我好樂意解答呀!

下面係有關一個早產BB 嘅故事,希望可以鼓勵每一個「你」

Story of Ward

所有父母都唔好睇少自己,你哋對BB嘅接觸同愛係絕對俾到BB生存嘅力量!PEOPLE CANNOT SURVIVE WITHOUT TOUCH!