蘋果桂圓燉桃膠

蘋果桂圓燉桃膠

專欄

廣告

依排係FB啲煮食版都俾桃膠洗版,又平又滋補嘅嘢當然係勁想試,不過搵左好耐都買唔到,終於今日行過北角街市終於俾我買到啦!另外有朋友話上環海味街都有售!第一次試整都唔打算太花巧,利用屋企嘅現有材料,整依個蘋果桂圓燉桃膠啦!

 

哈哈哈…見啲網友仔真係讚得好利害,當然係好想試下。其實「桃膠」乃桃樹嘅天然分泌物,於樹上結成琥珀色晶體,蘊含豐富植物膠原,具美顏、滋補功效,最重要是價錢較傳統花膠、燕窩便宜,絕對是平民養顏恩物,而且其功效近似燕窩,冬天用來煲糖水相當滋潤~

由於都係第一次煮,所以都唔敢煮太多,同埋係咩味道,所以今次就冇預小小豬份,只係煮兩人份量先啦!

 

蘋果一個、桃膠一湯匙、桂圓約六粒、紅棗六粒、南北杏半湯匙、冰糖少少(視乎個人喜愛嘅甜度啦)~

 

桃膠用水浸6-8小時至發大,途中最好換幾次水~

 

要留意桃膠都係啲天然食材,難免有啲雜質,所以要細心咁除去啲黑色雜質呀~

下頁續

浸好左啲桃膠又真係比初時大好多倍,亮晶晶咁又幾靚哦~

 

蘋果去皮去芯切粗粒~

 

桂圓、紅棗及南北杏就浸洗備用~

 

將蘋果、桂圓、紅棗及南北杏連用兩飯碗水放入燉盅內~

 

放入電子燉盅內先燉45分鐘~

下頁續

其後再將冰糖及桃膠加入燉盅內,再燉30分鐘~

 

食得啦…記得要趁熱食呀~

 

第一次燉蘋果,連埋啲果肉一齊食,甜得嚟又有點酒香味(哈哈哈…我都冇落酒,應該係個蘋果發出嚟嘅),估唔到又幾好食。

 

之前睇網友講話桃膠囗感似雪蛤膏,算我一向少食貴嘢,唔知雪蛤膏係咩味。不過我就覺得有啲似啫喱,加埋啲糖水一齊食,口感同味道都唔錯呀~

 

桃膠其實仲有好多配搭,我買左成一大盒,今次都只係用左少少,所以….真係可以慢慢整多啲唔同花款,等自己滋一滋先得!