王浩信

憑《踩過界》盲俠一角奪視帝 王浩信台上感謝太太

熱話

廣告

《萬千星輝頒獎典禮》完美落幕,視后由《不懂撒嬌的女人》中飾演Cherry的唐詩詠獲得,至於視帝由《踩過界》中飾演盲俠一角的王浩信(Vincent)奪得!Vincent喺台上多謝父母的支持,「雖然我呢段時間一蚊都無拎過返,但佢哋都毫無怨言。」最後Vincent仲多謝太太陳自瑤(Yoyo),「多謝你將家庭同囡囡照顧得咁好!」好Sweet呀!

 

撰文:Sunday Kiss
相片:新傳媒資料室

Vincent早前接受訪問坦言自己上年的確少咗時間花喺屋企,所以頭家交埋俾Yoyo打理,能夠打頭家打理得井井有條,等老公可以放心出去拼搏,Yoyo絕對係個好老婆啦!

Vincent坦言:「呢一年,我返屋企嘅時間係相當之少,呢樣嘢我係做得唔夠好,希望我屋企人體諒。我諗嚟緊可能花啲時間去旅行,阿女依家大個、懂性、享受到假期,希望可以同佢哋一齊去旅行。」

王浩信:盲俠--從演以來最有挑戰性的角色

早前Vincent接受訪問時,講過盲俠一角係從演以來最有挑戰性的角色。「收到《踩過界》個劇本好興奮,因為so far拍過最有挑戰性,又係林志華監製,佢同我都好多部合作,佢不斷挑戰緊我條界,我覺得難在佢將兩個幾難處理嘅身份擺埋一齊,一個係殘障人士,另外係大律師,一個正常人要考到大律師執照其實係好難,仲要係盲嘅人,點睇案例?點獲得法律知識?其實係好難。」

花好多心機演好盲俠一角

正因為盲俠呢個角色咁有挑戰性,所以Vincent花咗好多心機去準備。「最開頭安排去盲人中心練習,練習點去用白杖、用耳朵去感受生活要面對嘅事情,譬如煮飯、切餸、睇書、點用iPhone 、過馬路點聽行人過路燈⋯⋯呢個角色有趣嘅地方就係一個盲人點判辯是非同幫弱勢社群爭取公義,我覺得呢個題材係非常之有趣,除咗盲,仲有法律方面,睇關於法律嘅戲、睇律師點上court打官司嘅知識去做準備。」

《踩過界》出到嚟反應好好,Vincent都好感恩。「由《不懂》開始網上有好多討論,draw咗好多觀眾去睇,係我哋演員好大嘅得着,今次係第一次同愛奇藝合作,內地嘅點擊率都令我哋好鼓舞。」

《踩》內地點擊率咁高,Vincent直言有諗過北上。「我絕對唔介意有咁樣嘅機會。我本身屋企人同我都係講國語,所以我起碼同大家溝通到,我都希望有更加多觀眾可以睇到我嘅作品,如果呢個係一個渠道,我會想去做。」

王浩信 人氣大爆發

34歲的 王浩信 去年憑劇集《EU超時任務》中「渠頭」一角彈起,去年頒獎禮被網民捧成視帝大熱,雖然最後只與同劇的朱千雪在台慶頒獎禮中獲「最受歡迎劇集搭檔」獎,但人氣急升演技亦備受肯定。受無綫力捧的王浩信劇接劇,拍劇工在作日夜癲倒,再加上大量的商業活動及宣傳活動,搞到成年都冇放過假。

上年劇接劇忙到有氣無碇抖,王浩信接受訪問時直言過去一年長時間缺乏休息:「去年至今拍咗《不憧撒嬌的女人》、《踩過界》同《溏心風暴3》,我已經同公司講真係要抖一抖,呢一年加埋嘅假期得三日,但嗰三日都要準備第二日嘅劇本,根本唔算真正放假,去年撞完車,我嘅身體狀況差咗好多,日夜顛倒咁拍劇每日平均要開廿幾個鐘,我真係體能有限。」

王浩信 囡囡 溫馨做運動

王浩信早前難得有一日假,老婆YoYo卻要出埠工作,於是湊女責任落在他身上,兩父女去到將軍澳寓所附近的公園做運動!當日太陽曬正頭頂,QQ大汗淋漓盡,幸好有個體貼爸爸左手拎毛巾、右手拎水樽,一停低就埋身抹汗餵水。現埸所見,每次QQ因為太熱太辛苦而撒嬌,王浩信都有方法氹番個女笑,踩咗個幾小時單車,兩父女手拖手步行返家,睇得出QQ好黐爸爸,二人都很珍惜共渡的時光。

被問到會唔會覺得工作同家庭好難平衡, 王浩信 表示:「作為家庭支柱,照顧屋企係我嘅責任,盡量想抽多啲時間畀屋企人,囡囡嘅成長更加唔可以錯過。我唔抗拒工作,努力咗咁多年,終於有啲成績,我會想繼續向前,同時亦想盡量抽時間畀太太同個女,為咗佢哋,幾辛苦都值得!」如果真係再追多個,YoYo會唔會退出幕前做全職媽媽? 王浩信稱:「其實依家財政上我完全負擔得到,佢已經可以唔使做。不過YoYo鍾意演戲,我亦好尊重佢嘅選擇,到時生多個佢專注湊小朋友都ok嘅!」

造人大計無期

近年 王浩信 與YoYo不止一次向外表示有計劃再生多個,不過二人的工作與作息時間似乎未能配合,所以至今仍未有好消息。其實 王浩信 與 YoYo輪住飛,再加上要照顧QQ,唔好話造人,兩公婆撐枱腳二人世界嘅時間都唔多。據知嚟緊公司幫王浩信接了唔少賺錢騷,年尾又有頒獎禮同台慶,他希望可以賺多啲,等太太可以唔使做,專心湊小朋友!王浩信目標明確,暖男唔係得個講字,拍晒心口話用行動證明,呢啲好老公去邊度搵?