細數4間傳統名校港產片場景 留住港味歷史 重現青澀校園風
撰文：Joanne｜編輯：YCL｜圖片：官方劇照
其實香港唔少傳統名校嘅校舍，唔止喺建築上有特色，而且周邊環境仲好靚！ 好多港產片，都會嚟呢啲學校取景架！一齊睇吓仲邊啲港產片經典場口，同邊啲學校啦！
港產片名校1.《哪一天我們會飛》- 華仁書院(九龍)
《哪一天我們會飛》，「飛」當然係電影入面一個重要嘅元素啦，又要放飛機，又要玩滑翔翼，間學校空間少啲都唔得！九華雖然係津校，不過校舍一啲都唔平民！校址位於窩打老道黃金地段，佔地超過四萬平方米，面積之大喺津校當中可以話係數一數二，設施方面更係高於津校硬件標準，校內設有一個標準草地足球場、一個硬地足球場、一個標準游泳池、兩個籃球場及三個網球場等，要玩「飛」，點會唔夠空間？
戲中嘅學校名叫「英仁書院」，因為導演黃修平，同監製陳心遙分別係「英華書院」同「華仁書院」嘅畢業生，，所以就將兩校名字合併，成為「英仁書院」，更設定為一間男女校。陳心遙創作劇本時，所寫場景都會同母校嘅記憶連繫起嚟，多得母校嘅神父同老師嘅支持，終得到校方首肯借出場地拍攝，而九華上一次借出校園拍攝電影，都係港產片，不過是上世紀由溫拿主演嘅《大家樂》。
紀念碑草地
女主角楊千嬅穿過嘅呢片小天地，就係喺聖堂同主樓嘅中間，旁邊有走廊貫穿，佇立喺草地上嘅紀念碑，係為紀念九華60周年所建嘅，紀念碑對出嘅凹位，就係華仁仔平時聚集嘅地方。
主樓
電影入面，飛行學會搞活動嘅地方，就係主樓對出嘅空地，亦都係而家教職員泊車嘅地方。主樓係九華第一棟落成嘅建築物，喺1952年竣工，地下係學生食堂、小賣部、校長室、會議室等等。
主樓有三層高，一樓同二樓主要都係課室，而三樓就係學生止步嘅神父宿舍。九華大部分神父來自愛爾蘭， 而綠色就係愛爾蘭嘅傳統顏色， 所以亦都成為咗九華代表顏色。主樓走廊設計優雅，有屏風式嘅通風設計，圍欄花紋既特別又有氣質。
硬地足球場
飾演少年林海峰同楊千嬅嘅游學修、蘇麗珊，喺戲中玩滑翔翼嘅地方，就係喺衛理道旁嘅硬地足球場，穿過樹蔭下嘅小樓梯，就會見到3個網球場。
硬地足球場旁邊有一棵大樹，已經成為咗學生嘅許願樹，學生會用波鞋代替寶牒，掟上樹上許願，都幾有情懷架!
利瑪竇樓
相片中飾演蘇博文嘅吳肇軒，所處於嘅位置應該係主樓嘅天台，而佢身後嘅建築物，就係利瑪竇樓，本身喺電影中設定嘅九十年代係唔存在架! 因為佢係喺2006年先落成嘅，大樓設有露天平台、課室、學生活動中心及音樂中心等等。
九華係少數位於市區， 兼擁有大型綠化園林校舍嘅學校。利瑪竇樓嘅視野超開揚，對出就係一個標準嘅草地足球場!
校舍大，但係學校給予學生休息嘅空間亦都好充滿，新翼大樓就有一個平台，可以俾學生落堂之後抖抖氣!
華仁仔喺音樂方面有非常出色嘅表現，所以校方都大力支持，仲特設一個音樂中心俾學生去練習內，中心入面有一個音樂室，一個排練室，同六個練習室。
港產片名校2.《歲月神偷 》- 拔萃男書院
2010年嘅港產片《歲月神偷》，係以香港一家平常人家，如何面對環境改變嘅故事，亦都係導演羅啟銳嘅半自傳電影。羅導演本身就係拔萃仔，所以電影有唔少戲份，都係喺母校取景。而任達華飾演嘅爸爸，喺戲入面經常要為幫大仔李治廷交學費而節衣縮食，可見六十年代嘅男拔已經係一間貴族名校。
電影中李治廷及鍾紹圖飾演兩兄弟，感情要好，細佬仲成日會走去哥哥學校八卦。現實中，細佬嘅角色，就係導演羅啟銳自己。
李治廷飾演嘅哥哥Desmond，係男拔嘅風頭躉，同而家好多拔萃仔都一樣，成績又好，亦都係運動健將!
男拔校舍位於加多利山上，係全港佔地面積第二大的中學。唔止有一個標準真草足球場，仲有跑道俾學生練跑。
《歲月神偷》係由電影發展基金資助拍攝，所以預算相當有限，據知當時任達及吳君如亦都係以一個終極友情價接拍，所以片中唔少客串嘅師生，都真係男拔嘅師生嚟架!
港產片名校3.《最強囍事》、《男人四十 》- 聖嘉勒女書院
位於港島西摩星嶺道嘅聖嘉勒女書院， 坐擁博寮海峽270度無敵海景， 環境優美，堪稱係「美絕」中西區嘅中學。正因為咁，亦都成為電影取景嘅勝地，當中包括2002年嘅《男人四十 》以為2011年嘅《最強囍事》。
由張學友及林嘉欣主演嘅《男人四十》，係以師生戀為題材嘅電影，圖書館同課室，都係電影中嘅主要場景。
《Sunday Kiss》記者去聖嘉勒做採訪嘅時候，校舍就已經裝修過，圖書館成個感覺同陳設都已經唔同哂，光猛咗好多!
據知《 最強囍事》嘅製片，本身亦都係聖嘉勒嘅校友，所以知道要拍劉嘉玲同甄子丹呢場結婚戲嗰陣，就向母校提出喺小聖堂內拍攝嘅要求。
雖然聖嘉勒校舍喺早年經過一次大翻新，不過小聖堂就冇太大改動，依然保留最初嘅面貌，學校大大小小嘅宗教活動，都會喺呢度舉行。
港產片名校4. 《雛妓》- 聖士提反書院
聖士提反書院係全港面積最大中學，亦都係香港少數寄宿學校，校內有多座校舍都被列為歷史建築，亦都係唯一有喺校內設置文物徑嘅中學。孭住咁多個「冧巴溫」喺身，當然有好多電影爭住嚟呢度取景啦!其中包括有《 仙樂飄飄》、《天作之盒》、《歲月神偷》，最近期嘅有《雛妓》。
不過電影喺聖士提反拍攝嘅戲份，主要都係帶過阿Sa嘅新校園生活，所以睇戲嗰陣，都睇唔到聖士提反嘅巨型草坪同無敵海景。
電影中阿Sa向任達華飾演嘅教育局高官出賣身體，以換取對方嘅照顧，又獲安排入一間Band 1名校，不過阿Sa身穿嘅校服，顯然同正牌嘅聖士提反學生唔一樣。
呢場戲係喺聖士提反嘅圖書館拍攝，呢度前身其實係禮堂，面積近8000平方尺，分為兩層，除咗夠大同有書卷味之外，最威就係入面藏書高達6萬冊!
