叱咤2023｜林海峰句句有骨 狂爆金句句句質疑樂迷投票、窒到台下鏡仔應一應
林海峰嘲笑「樂迷投票」機制 2018頒畀古天樂反問「有冇攪錯」
林海峰整段個人show，都是用張敬軒來做主角來發揮：「張敬軒，唯獨2014年攞過一次，之前嘅勁敵大部份都係前輩，當佢嘅前輩慢慢離開頒獎台之後，佢就成為我最喜愛男歌手，點知遇到一個又一個更強勁嘅對手，去到2018年，張敬軒面對一個樂壇經歷海嘯，我打開「我最喜愛的男歌手」信封嘅時候我見到古天樂，我爆咗4個大字『有冇攪錯』，結果工作人員話『樂迷投票』，結果我將一個『我最喜愛男歌手』頒咗畀一個影帝……」
林海峰又講MIRROR：要等到Frankie攞埋獎先到你
林海峰繼續講，表示張敬軒遇到的一大難關，就是MIRROR，言談間更將外傳的「下弦」Frankie拿出來做笑話：
「然後去到2020年，張敬軒面對另一樣厄運，爆發社區流行，叫『MIRROR大流行』，當初連續姜濤攞咗『我最喜愛男歌手』2年，跟住嗰年頒咗俾Anson Lo，坐喺第一行，左邊一個Edan右邊一個Anson，仲要Anson都有2個，即係如果你要拎『我最喜愛男歌手』，你要等到Frankie攞埋獎先到你㗎喇，即係要等多12年先喇！」
林海峰講尹光 「關愛座」都要讓？
林海峰笑言張敬軒今年推出《隱形遊樂場》這首至尊金曲，不過卻連呢個遊樂場都玩佢：
「點知突然爆出一個尹光，關愛座都要讓？一個姜B一個光B，加埋差唔多成百歲，好多人話長江後浪推前浪，有冇見過『長江前浪被前浪推』？」
林海峰強調會繼續玩落去 爆有歌手怨：「唔好玩我啦」
林海峰續稱，自己都有反思是否玩得太盡：「年年都係咁，頒呢個『我最喜愛男歌手』林海峰又喺度玩人，好過份，有人同我講「唔好玩我啦阿Jan」，我都有反思係咪好過份，但我會繼續玩落去㗎，因為一路有一個人我玩唔到，佢一直喺台下面！」
林海峰講足3次張敬軒
林海峰繼續大讚張敬軒示範了甚麼叫「有玩未為輸」，並稱他從來沒放棄，繼續玩好他的音樂，不卑不亢：「10年磨一劍，叱咤歷史性時刻，重要嘅嘢講3次，張敬軒、張敬軒、張敬軒！！！！」
2014年林海峰棟篤笑 盤點賽果「發神經」
張敬軒高EQ回應林海峰「前浪推後浪」論 嘆好難攞我最喜愛的男歌手
張敬軒繼2014年首奪「叱咤樂壇我最喜愛的男歌手」（當年對手係 羅力威、周柏豪、陳奕迅、張智霖）後，相隔十年擊敗姜濤、陳卓賢、尹光和Anson Lo盧瀚霆再封王！得獎一刻，軒公開心到大叫！
張敬軒高EQ回應「前浪推後浪」論
林海峰台上講過今年有光B同張敬軒「前浪」衝擊「後浪」 歌手，面對這個反向競爭，張敬軒高EQ回應：「我而家都暈晒浪我都唔知係咩浪，反正我自己要係一個浪囉」，張敬軒直言自己都有迷失時候，「有時係一個選擇嚟㗎，有時喺呢行當過咗一兩年，當個運冇咗、啲歌唔去、或者自己嘅創作時不與我，就會好容易會氣餒同埋會跌入一個自己嘅做比自己嘅小天地，我都有亂諗嘢嘅時候。」
張敬軒感謝「光B」陪伴殺入5強：氣氛好玩好多
被問到擊敗「光B」會否有點不好意思，張敬軒反而更感激「光B」呢位長輩的支持：「其實我覺得好早階段開始光哥已經讓賽，佢特登已經有同我講，打俾我話投同你一票啊，同埋其實我自己今次係有咗光哥個氣氛好玩好多，以往我都一個人，好似往年咁，剩返我一個對住MIRROR，就會覺得我要好審慎，呢一鋪有尹光哥哥陪我好似溝淡咗。」他又以讀書形容得獎：「呢個同我細個讀書嘅時候好似，我都唔係最高分嗰個，我亦都冇話特別邊一科特別叻，但平均分OK，所以每一科老師都唔討厭我。」
尹光出post感謝張敬軒
尹光於頒獎禮後，在IG出post恭喜打敗自己奪得「我最喜愛男歌手」的張敬軒：「今晚好高興 多謝有幸出席呢個盛事 非常出色👍🏼👍🏼恭喜哂軒公🎉 實至名歸！」
相隔十年再封王張敬軒：有啲陌生同熟悉
至於林海峰頒獎一刻狂嗌張敬軒，被問怕唔怕又畀佢玩：「台上嗌咗我個名兩次，我又覺得冇嘢喎，要提『張敬軒』嘅Air Time都唔少錢，同埋我都好開心，我都未試過喺亞博見到自己個名咁大隻字咁多下，我覺得都好威㗎喇，但係冇諗過囉冇諗過之餘，亦都有啲陌生同熟悉，因為我10年前2014年嘅1月1號係我人生第一次攞呢個獎，咁呢10年發生咗好多事，其實我都有諗過離呢個獎項好遠，因為潮流變緊，觀眾嘅審美變緊，我啲fans有年紀變緊，所以變咗唔出奇，每個人嘅路都唔同，有啲人係跑步嘛，可能兩三年就攞獎啦，好似我自己嘅命運要努力耕耘先至有，所以好多謝上帝。」
張敬軒嘆好難攞呢個獎 勝在「有票未為輸」
張敬軒接受訪問重提得獎一刻心情：「好激動呀，好開心呀，因為好難呀！要攞呢個獎已經係一件好困難嘅事，的確MIRROR嘅呼聲同埋fans好落力幫佢哋拉票啊投票咁，但係『有票未為輸』今次落區拉票攻勢老黎」（順利）。」
他更笑指要將拉票行動升級：「所以2024年我會繼續同埋我都會開始去，因為我今次寫揮春或者擺街站嗰啲都唔靚，下次會upgrade一下，我自己會砌一個專門『拉票攞你命3000』，可能有寫揮春、AI寫揮春、仲有電子血壓計，睇吓啲咩利民措施」
張敬軒：我喺連登睇完啲人鬧我都會有唔開心
張敬軒再鼓勵一眾後輩要有良好心態面對得失高低：「啱啱喺台上都唔記得講，我想鼓勵吓一啲後輩，就算我自己做咗咁多年，呢幾年不停咁開演唱會，大家見到我生意上都過得去，其實我都會有迷失，我喺連登睇完啲人鬧我都會有唔開心，但係人就係咁，呢份工福禍相依，你要接受到啲掌聲同讚美，背後就要接受到啲批評，可能佢哋講嘅係啱或者佢鬧得中我，令到自己個人再完善啲，所以喺10年裏面係鍛鍊出嚟嘅一個心態，所以今年有呢個獎，相信係自己人生階段最好嘅時間去接受呢一個獎。」
2022年惡搞《正義迴廊》 句句寸到入肺
今年雖然林海峰未有搞Solo「是但噏」環節，但就改做拍片惡搞《正義迴廊》，逐個點評有份入圍同無份入圍「叱咤樂壇我最喜愛的男歌手」嘅大熱嘅男歌手。林海峰一開波就寸張敬軒喺年紀最大的「早餐界KOL」，之後又重提自己上年嚇親AnsonLo一事，事情嚴重到要判自己「終身監禁」。跟住又寸叱咤今年橫掃多獎的林家謙同MC張天賦竟然冇份入圍，相反專注拍戲嘅Edan就有份入圍，真係句句寸到入心入肺！
林海峰2022年唔敢再搞事
林海峰今日一出場就表示吸收了上次的教訓，今次頒獎不會再搞事，只會簡單讀出得獎人的姓名。隨後就直接宣佈「叱咤樂壇我最喜愛的男歌手」的得獎者便是去年被林海峰惡搞過的Anson Lo。被林海峰玩過一次的Anson Lo一聽到自己名字的時候都不敢上台，怕被林海峰再玩多次，等到林海峰親自到台下請Anson Lo上台先敢行上台！
