河國榮逝世｜居港37年熱愛香港 IG最後發文提及林憶蓮歌曲

河國榮IG久未有更近 最後發文提及喜愛的林憶蓮歌曲

有消息指據河國榮太太亦於3個月前離世。其社交網絡久未有更新，對上一次發文是2023年8月28日，由美加回港的河國榮在西貢家中打理農地，笑容滿臉寫下：

去咗美國六個星期，返嚟農田嘅嘢草當然又高又多 😂 不過香港種菜最重要嘅季節就嚟開始，所以想偷懶都唔好太懶，每日做兩三個鐘（天氣好焗！）。好彩有音樂陪住我。一路掹草一路聴《灰色》（編按： 林憶蓮的歌曲）

——————————————
防止自殺求助熱線：
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255

TVB「御用外國人」2008離巢活躍於網上頻道

河國榮在1988年由澳洲來港發展，其後有機會成為全職演員，更成為無綫，曾參演約300部劇集，經常獲派扮演警司、牧師、傳教士、領事、律師等角色，到了2008年決定離開無綫向外發展，8年前在100毛的頒獎禮演唱了一首 《香港地》，2019年8月簽約成為邵氏兄弟藝人。

河國榮最後幕前演出劇作《野人老師》劇情講述角色患癌

河國榮前年參演ViuTV劇集《野人老師》飾演的Tony很搶鏡，因為他在劇中被揭發患癌，最後在朋友陪伴下永別，令人留下深刻印象。入行多年的河國榮原來曾收養達13隻狗，大部分是混種唐狗，當正阿仔阿女般疼愛。在難熬的日子，他省自己開支，也要留最好予狗隻，他無悔收養，從沒想過不養，只因每隻狗都是珍貴的家人。

《野人老師》河國榮患癌臨終撼動人心

劇中飾演鄭丹瑞好朋友Tony（河國榮飾演）竟然愛上晨光（談善言飾演），主動邀請她約會。為了查明Tony突然出現的底細，李世豪、李白（Stanley邱士縉飾演）兩父子說服晨光接受Tony的約會。二人到郊外野餐，鬧出不少笑話；Tony更向晨光示愛，晨光只能拒絕。

眾人發現河國榮的國色患癌病重，剩下的時間不多，陳燦主動求和好，李世豪決定為Tony舉行一場沒有眼淚、只有歡呼聲的演唱會，最後Tony在兄弟陪伴下離開世界。

當時很多網民大讚好睇：「今晚個洋蔥大過西瓜，要用毛巾」、「今集係河國榮代表作」、「佢地嘅兄弟情同最後告別好感動」、「今集好感人，令人反思」、「每次看 ViuTv 劇集都有不同的題材，好睇又感人，ViuTv加油！」、「珍惜眼前人」。

《飛虎3壯志英雄》河國榮演奸角

自從簽約邵氏後，河國榮仍偶有客串TVB劇 ，2022年邵氏劇《飛虎3壯志英雄》，在劇中飾演反派角色「羅智勇」是個幫犯罪組織開地下賬戶洗黑錢的金融集團主席，全劇都著得西裝骨骨。好多網民都話難得再見到河國榮現身TVB熒幕，其實早前他亦曾與王敏德、何慈茵等《飛虎3》拍檔，一齊上過TVB節目《思家大戰》做嘉賓。

河國榮關注流浪狗 當狗狗是仔女

河國榮自小在澳洲農場長大，對動物有種情意結，來港也愛跟動物接觸，家中曾養7 隻狗，即使工作多忙，也會每天抽時間放狗。他亦關注動物議題，早前為動物機構《救狗之家》（HKDR）拍攝短片：「佢哋無屋企，之不過係佢哋社會上地位太卑微，無人愛、無人理……點解唔救吓呢啲狗仔？」

河國榮 愛香港每事每物，更熱愛及尊重生命，無分疆界。他的Facebook寫道：「我們愛如同仔女一樣的13個狗狗都是收養的，除了一個主人棄養的狗B之外，他們都是雜種唐狗。」跟河國榮談狗，他以「個」量詞，非用「隻」，facebook提起狗都用「他」而非「牠」，不是河國榮中文不好，事實是在他心目中，狗狗是自己的仔女，視狗如「人」。

一年間四狗離世：走咗嘅個個都掛住，非常難過

家中多老狗，近年健康出問題。2015年， 河國榮 有四個子女（狗）離開了，其中兩狗患有腦癌。「我跟太太不嬲都會睇實狗健康，腦癌問題可以照腦確實，但無得醫，而老狗要去照要全身麻醉，有危險性，所以唔會去照。佢哋走時會火化，依家屋企有七個罌，走咗嘅個個都掛住，非常難過。其中有一個本來係村流浪，我哋同佢friend咗，佢生癌，加上傷口有食肉烏蠅蟲，要打針送佢走，我同太太決定帶佢返屋企，最後等佢都叫有個屋企。老人家（老狗）返屋企係會叫我，嗚嗚嗚表示好開心，近排好忙，覺得少咗時間陪佢哋。」

問河國榮選擇養狗而不養人仔，他輕輕帶過：「我同太太無特別好想要小朋友。」之後說出他的看法。「兩者是有分別，有啲人認為有BB就唔養得寵物，其實我細個農場長大，身邊有貓有狗有雞有鴨，BB唔怕，反而可以同動物發展良好關係，污糟方面，BB有免疫系統嘛，你反而要佢百分百乾淨，長大好易病。」

不怕養狗開支高昂：你唔會話唔夠錢唔理屋企人

河國榮演戲收入不夠，擔心經濟問題，曾擺檔賣首飾，然而，他從沒埋怨養狗開支多。「通貨膨脹，老人家狗又唔可以食平嘢，600幾蚊一包靚糧，只係食嘢，12狗都要每月六千。老人家醫藥費係非常之貴，好多都要長期食藥，最近有一個要剝晒啲牙，成7,000蚊。沒有後悔養咁多狗，養時唔會諗呢啲嘢，要承諾照顧一生一世，加上佢哋係我仔女，有個關係喺度，你唔會話唔夠錢、好辛苦而唔理屋企人，唔會後悔帶佢哋返屋企養。養狗係一種享受，係有負擔、責任，你俾物質、錢、狗糧、藥物等等，但佢會俾番你感情、忠心、開心，係一個特別感受，好值得！」他形容自己跟大部分父母一樣對待子女，寧願省自己使費，將金錢留予狗狗用。他坦言本身少買衫，一年才添購一兩次新衣，只是近期天天接受訪問，苦惱沒有太多衣服穿！

有指 河國榮吃素為了省錢，他解畫：「主力食素都有八年，喺屋企食蔬菜，出街無嘢食先食肉。食素慳錢唔係原因之一，係附帶bonus。原因係為健康同環保，食肉嘅碳排放係蔬菜九倍，另一方面知道好多養同處理方法太殘忍。」他曾經想過創立「開心肉農場」，牛可以周圍走，屠宰用最人道方法，不可以讓牛見到同類被處理、離世時無痛等等。

養狗是對生命尊重

回想， 河國榮跟每隻狗都是奇妙的緣分。訪問時，有一隻狗陪伴在側。 河國榮說起其故事：「Jason係自來狗，大約一歲時，有一晚坐喺屋企後面望風景，我聞到陣腐爛味，佢戴頸帶太緊食咗落去肉度，我小心咁幫佢解開頸帶，跟住佢入咗嚟我花園，食我啲嘢，咁佢好大鑊，又要醫嘛，就養佢囉。呢啲係緣分啦，自來狗。」笑笑口的Jason非常親人，很多村民都會跟他打招呼，河國榮表示他本來很惡呢。

養狗其實是對生命尊重，不忍生命在眼前流走。「頭三個都係主人唔要佢，我跟太太同狗狗熟，咁知道主人擗低佢，就收養。第四個就係領養，去愛護動物協會，有狗B得手掌咁大，佢哋話要人手餵奶，但無人手，我就帶佢返屋企，佢竟然唔需要飲奶，佢好靚係狼狗混種，好忠心，好正！」再說，有次幫朋友餵山狗，河國榮見到BB狗，怕他餓倒或被其他狗教訓就捉回家，第二日再找到同胎三狗B，一併帶回家。就這樣，一年間，有九隻狗入室，成為河家成員。

老婆不離不棄跟他共度抑鬱

那麼多狗，有否偏心？河國榮想一想說：「其實好公平，個個各有性格，都錫。」好爸爸河國榮直言自己出街會盡快回家。「無論我兩點瞓，又或四點瞓，點都會八點起身，因為每日八點零八分帶佢哋出去散步。有鄰居零四分、零五分開車返工，唔想狗狗同啲車一齊，怕有意外，所以零八分出門。」

太太與狗隻一直在河國榮身邊，不離不棄。來港35年，最難捱日子是2000年。「當時為生計，我寫電腦程式，每日寫十幾個鐘，每晚瞓三個鐘，維持咗三、四個月，身體負荷唔到，荷爾蒙失調，有情緒病，醫生就叫做『抑鬱』，開始咗五六七年辛苦，荷爾蒙失調成日發脾氣唔開心，有責任嘅事面對唔到，好多事做唔到，變咗幫人寫data base去到最後一分鐘先去寫。不過，好得意，嗰時返TVB拍劇一入廠就無嘢。」回想，他感謝太太受了他很多脾氣，而不論他甚麼狀況，狗狗都會開心歡迎他，或多或少讓他有個舒懷的安樂窩。

不再添狗狗追夢去

問及會否有意再添狗，他耍手擰頭。「我依家唔敢，負擔時間同金錢好大，手頭上小朋友會全心全意照顧到最尾，短期內唔會再收養。如果想放假去耐啲唔得，好似我鍾意讀語言，想去日本、以色列三個月，或同太太一齊去旅行，屋企有啲BB（狗）喺度就唔得。」河國榮直言照顧了14隻狗已不算小兒科，下一步想全心全意追唱歌夢。「如果唔敢，就唔會買單程機票嚟香港，就唔會離開TVB，離開TVB後就唔會再演戲。理性嘅人就會開間英文補習社搵大錢，其實我已經讀咗可以拎教學證書，可以開公司，但一開就要全職做老闆，放棄唱歌夢。」河國榮今年一定出唱片，繼續自我挑戰。

後記：簡單率性

有傳河國榮為怕踩到狗尾巴而不穿鞋放狗，他笑指當然不是，只是小時候在農場長大，習慣及享受不穿鞋通山走而已。他自言有種敏感體質，會感受到動物在想甚麼，可能是源於能放下自己、放下人類的自大，享受融入大自然，並多為動物想想。