馬詠茹 2015年參選學界女神

Vivian本身好鍾意運動，亦都好有天份，喺學校係體育組嘅成員，專項係玩田徑，另外佢自己都好like踩單車同roller，仲係香港單車代表隊嘅成員tim!

讀緊中六嘅Vivian，今年就要考DSE喇，為咗集中精神考好個試，佢而家都已經向港隊請咗假，暫停所有練習，仲幾乎晚晚都去補習，希望可以考到好成績入大學。

Vivian話要兼顧讀書同踩單車係好辛苦，有時為咗讀書，冇辦法唔犧牲練車嘅時間。試過有一次，同一個隊友一齊出賽，雖然賽前冇咩機會練習，但係最後都攞到第四名。不過佢嘅教練就好激氣，覺得佢哋明明係有天份，有機會攞到更好成績，都唔俾心機練習! 所以有時都好無奈!

問到Vivian第時係咪會繼續踩單車，佢話而家都仲考慮緊，因為如果考完試要重返港隊，就好有機會被要求轉做全職運動員，但係佢就好想讀好書先，所以都仲諗緊究竟自己條路想點行!

有啲朋友會叫Vivian做「wing wing公主」，諗落其實佢都真係好似公主咁，有好多人鍚架! 例如英華因為喺半山嘅校舍要重建，所以暫時搬咗去深水埗，由於Vivian同妹妹係同校嘅，佢哋Daddy Mummy，為咗等佢哋返學方便啲，就舉家由中西區搬咗去長沙灣；有時去街夜少少，Daddy仲會做埋「柴可夫」接送，真係錫到佢燶啦!

撰文: Joanne

攝影: Clay Lam

攝錄及剪接: 豪

Hair:Willson@KINGS Makeup

Makeup: King@KINGS Makeup(photo) , Sirrine Lam @ shu uemura(video)

鳴謝:Bike The Moment Store髦民士多(9823 9179)提供場地