無花果菊花茶

滋潤明目 無花果菊花茶

熱話

廣告

早幾日奶奶上嚟探小小豬嘅時候,佢買左好多粒又大又紅嘅蘋果,有咁多粒都好難一次過食晒,最好就當然係用嚟煲涼茶,所以就煲蘋果 無花果菊花茶 ,等小小豬保護眼睛之餘,又可以滋潤下啦!

 
撰文:小小豬的成長日誌
圖片:小小豬的成長日誌

哈哈…其實今次我都冇特定煲啲乜,只係小小豬話啲涼茶飲晒冇嘢食(依個衰豬真係似足我,唔鐘意飲清水),見屋企有蘋果,又有無花果,所以就用佢地嚟煲 無花果菊花茶 啦!

無花果菊花茶

材料:
今次我就用左蘋果3個、無花果6粒同埋菊花一両(約37.5g)~

做法:
首先將蘋果洗淨去核及切粗粒(記得要係洗蘋果前用刀刮了一圈,刮走面嗰一層果蠟);無花果切開細細份;菊花先用浸半個鐘後,瀝亁備用~

先加入約3公升水,然後加蘋果粒及無花果~

待水滾後,轉慢火加蓋用細火煲40分鐘~

最後再加入菊花,要煲多約15分鐘~

最後焗多15分鍾,隔楂後就可以飲啦~

有蘋果同無花果嘅甜味,仲有佢最鐘意嘅菊花茶味,小小豬而點會唔鐘意呢,完全唔洗我提,話咁快就飲晒成杯啦!

所以話呢..間唔中喺屋企入定啲材料,到有需要時都可以隨手煲到涼茶滿足小小豬,所以老公唔成再成日話我好似個婆仔咁買買埋埋一包二包,到有需要時就係我嘅武器,隨時可以出手呀!

溫馨提示:由於材料都涉及藥材成分,所以都係好因應個人體質,所以大家記得係煲之前,要了解自己嘅體質,如有需要可以問下相熟中醫/藥材店職員,呢個湯茶啱唔啱自己呀!
BY 小小豬的成長日誌