侍產假

政府倡男士侍產假由3日變5日 張宇人議員話:一日都唔應該有!

熱話

廣告

政府早前向立法會提交增加男士侍產假日數草案,建議由現時3日增至5日,期間僱員可獲8成薪酬。會上多名議員提出多項修正案,更有要求侍產假日數增至7日,並可獲全額薪金。不過立法會議員、自由黨主席兼行會成員張宇人接受《新聞透視》訪問時,就直言:「侍產假一日都唔應該有」。言論一出,即引起公眾激烈討論!

撰文:Sunday Kiss 圖片:新傳媒資料室、PhotoAC

惹火言論逐句睇

「你以為7日佢哋就會收手咩?7日就會有14日,14日就會有1個月、1年,然後仲鬧你哋僱主無良,不停咁鬧,佢哋永無止境咁苛索,佢哋係唔會停喺一個位。」

「侍產假一日都唔應該有!你可以話我無良,我老婆生晒,女兒、媳婦都生晒,我根本享受唔到,當然咩都反對,我哋年紀又點呢?我哋以前冇侍產假又點呢?係咪?以前我哋老婆冇產假又點呢?」

 

「我哋飲食業有幾十個工種,大廚同總廚有侍產假嘅話,我點請人頂替嗰個位呀?」

「你夠膽嘅話就嚟開食肆,全部都用你嘅標準,無論工時、工資乜嘢假期都好全部放入進去,你賺到錢嘅話你同我講!」

 

男士侍產假Q&A

Q: 想申請有咩資格?
A:-初生嬰兒的父親;連續受僱於同一僱主4星期或以上,每星期最少工作18小時;並已按法例規定通知僱主。而《僱傭條例》並無規定僱員必須與初生嬰兒的母親有法定婚姻關係才可享有侍產假。

Q:要幾時申請?
A:僱員須在嬰兒的預計出生日期前最少3個月通知僱主,其後便可在通知僱主實際放假日期後,即時放假。若未有在3個月前預先通知,則須在實際放假前5日告知僱主。

Q:點樣攞假?
A:僱員可在嬰兒的預計出生日期前 4 個星期,至嬰兒出生日期當日起計的10個星期內任擇日子。3日侍產假可自選一次過放,或分開逐日放取。

Q: 放假有無糧出?
A:如僱員做滿40周,並已經向僱主提供嬰兒的出生證明書,則可享有侍產假薪酬,款額為其每日平均工資的5分4,即8折出糧。僱員必須於放取首日侍產假後的 12 個月內向僱主提交所需文件。

Q:侍產假份糧幾時出?
A:法例規定,如僱員在假前交齊文件,僱主須於侍產假日後的第1個發薪日發薪;如僱員在假後交齊文件,僱主則須於提供文件後的第1個發薪日發薪。

亞洲地區侍產假福利

澳門:2日無薪
深圳及廣東省:10日全薪
台灣:5日全薪
新加坡:7日;薪酬由政府全包,以$2500新加坡元為限(約港幣$1.5萬)

日本:5日全薪
韓國:3日全薪及2日無薪