高手教7大BBQ技巧！快速透爐法＋輕鬆解決雞翼轉唔停
燒烤BBQ必學7式！
1. 薯片當炭精！極速透爐法
要BBQ？先決條件就係要有「火」，不過要享受優美嘅郊野環境，就唯有放棄有人「照顧」嘅燒烤場。不過並唔係人人都識得透爐，其實只要學識幾個小技巧，人人都可以「自力更生」，極速透爐！
首先將廚房用嘅廚紙，將佢捲成卷狀，再用剪刀分開一半，再扭實，最後再點少少油。擺放炭嘅方法最2條直2條橫咁搭成「井」型，再層層的堆疊上去，炭與炭之間必定要留有空間，讓空氣流通。最後加少少薯片碎上去，然後點火，因為薯片含油份，將佢放入炭堆凹入，一燒就會著火，比炭精更易起火！
2. 別掃油！
薯仔加洋葱燒烤網防粘法
起完爐，千祈唔好咁心急放嘢食上去燒住，因為火未夠猛好容易黐底㗎！特別係有啲人會比較鐘意用燒烤網，掃油本身係好方法，但啲油係咁滴落火爐，搞到個火猛晒，好易燒燶嘢食。教你燒烤前，切開生薯仔，用薯仔同洋葱抹一下網面，當中嘅澱粉質經加熱後就會形成一層薄膜，咁樣即使係燒魚都無咁易黐底，想燒乜都靚哂！
3. 燒原個芝士！ 自製芝士火鍋
呢個方法簡單又勁吸引，只要買件原個芝士擺喺爐邊「焊」溶，愛嚟點牛柳粒呀，丸呀，車厘茄咁，真係惹味到暈！係咪乜芝士都得？我哋請教咗Cheese BB嘅店主，佢話一定要揀軟芝士，例如Brie Cheese、Camembert Cheese同埋Gouda Cheese，通常買一個280g嘅小型芝士就夠2-4人食，唔好浪費嘛！
4. 無醃食物救星！ 喜馬拉亞山鹽
近來好多Camping露營嘅朋友，都會用「喜馬拉亞山粉紅岩鹽板」去整嘢食。其實拎呢塊岩鹽板去BBQ一樣得！同芝士一樣，只要放喺爐火邊「焊」磚鹽，跟手放啲食物上去！特別係一啲無醃嘅嘢食，例如茹類、海鮮之類，咁樣鹽燒法就唔會食物搶咗食物原本嘅鮮味，又有鹹味吊味，唉呀！總之就好味啦！而且岩鹽板燒完可再用番，不過千祈唔好用洗潔精洗啊！只要冷卻後用布加水抹走磚上嘅污漬咁就搞掂。
5. 唔叉先易燒！ 輕鬆燒多春魚
好多人都鐘意喺BBQ時燒多春魚，不過其實要燒出完美嘅多春魚，並唔使叉㗎！只要將多春魚平放喺燒烤叉上面，放在火上燒大約一分鐘，多春魚就會開始收縮。再燒多約一分鐘後，魚皮就會開始會痴住燒烤叉，咁樣就可直接反轉燒烤叉，燒熟另一面，而多春魚又可以保持完整唔會甩皮甩骨！
6. 燒雞翼不能打直穿 橫穿最易熟
好多人都鐘意食燒雞翼，不過需時又難烤得靚。雖然好多人都會教將雞翼打豎串起，不過其實始易會令受熱不均，而且叉得唔好後期仲會令雞翼轉唔停，只燒熟一面。正確方法應該將雞翼打橫串，串起厚肉，咁雞翼就可以輕易燒熟！
7. 燒棉花糖天才食法
喺日本就有網友將竹籤換成Pocky，插入棉花糖去用餘火烤。融化嘅朱古力加上微焦嘅棉花糖，係咪睇到都好想食呢？
燒過棉花糖嘅人，都知如果沒捉好時間同距離，棉花糖就會著火！發文嘅網民就俾咗個小貼士大家：「要先讓Pocky嘅朱古力稍微加熱溶化後，再插入棉花糖燒！如果朱古力無融化就直接插入棉花糖，手拎嘅餅乾部分好易會斷」。
