單親媽媽

名模Danielle 單親媽媽 出食譜自強

育兒

廣告

愛爾蘭、中國混血名模Danielle Graham 早年憑Olay廣告走紅,晉身名模行列,2002年捲入羅兆輝「情慾相簿」風波後淡出香港,返回馬來西亞重過新生活,2009年閃嫁大馬銀行界才俊 Patrick Khoo,婚後兩年抱兩,大仔Benjamin 轉眼七歲,細女Sophia 五歲。但一家四口幸福背後,原來早埋危機,Danielle 與Patrick 因性格不合愈走愈遠,最終今年決定離婚,各行各路,一對仔女跟媽咪,成為 單親媽媽 。

 

撰文:Ling
攝影:Sun(部分相片由受訪者提供)

[youtube id=”LAw-yARRTsw”]

離婚因性格不合

今年的Danielle就像坐上過山車,離婚讓她經歷了人生低谷,經常以淚洗面。她坦言兩人性格不合,前夫性格傳統,自己比較「鬼妹」,「我哋花咗好長時間去嘗試解決問題,但兩人唔夾可能分開仲好,我想小朋友喺健康環境成長,如果父母一齊唔開心,小朋友睇住我哋鬧交都會唔開心。」
離婚的決定十分艱難,她相信所有面對婚姻問題的人都會明白那種痛苦,而其中一個最大困難是時間管理,兩個孩子都好需要媽咪,「因為爹哋唔喺度,佢哋有咩事就係咁媽咪…媽咪……」

對子女必須坦白

Danielle自5歲從破碎家庭成長,現重蹈了父母覆轍,她的小女兒Sophia也正值5歲,能以過來人身份好好輔導。「佢哋比以前敏感,尤其係大仔敏感啲。我覺得最重要係向佢哋坦白,我唔想作古仔。佢哋要知道單親家庭發生喺好多人身上,自己唔係外星人,時間淡咗一切都會好起來。當然仔女希望爹哋媽咪一齊,但我哋已經盡力,雖然呢個唔係一個好結果,但我哋始終係一家人,爹哋媽咪只係分開住,有時間都可以一家人見面。」

現階段媽咪最需要給予小朋友安全感,並細心觀察情緒,Danielle堅持每晚6點準時開飯,在餐桌與孩子溝通。「一齊食飯俾仔女有一家人感覺,每日有咩開心唔開心,佢哋都會同我分享。」所以她希望藉新書宣揚一家人食飯的重要性,正如其書名《On The Table At Home》,她形容新書猶如第三個BB,在婚變期間將精神投放其中,展開人生新一頁。

仔女愛香港,必食雲吞麵

單親媽咪照顧兩個小孩非常吃力,Danielle每朝六點半起身,煮早餐、接送返學,做完運動及工作後去街市買餸,準備為孩子炮製晚餐。「我每日都係諗食 物,早餐諗午餐,午餐諗晚餐,每日都想為小朋友煮最好嘅餸。」Danielle為養家難以擔當全職媽媽,幸好在大馬有家人幫忙,仔女上學期間亦有空間接工 作,現繼續模特兒事業及宣傳新書,需大馬、中港兩邊走。「能夠平衡家庭同事業對我嚟講係好事,我會覺得開心啲,因為我都想豐富自己生命,做自己喜歡嘅事, 我更希望仔女對我嘅工作成果感到驕傲。」

最近Danielle的新書發布會,亦有帶同仔女一同來港出席,見證媽咪努力的成果。「佢哋嚟過香港好多次,好鍾意香港,最鍾意海洋公園、迪士尼樂園同雲吞麵!」她的最好朋友都在香港結識,亦相繼誕下小朋友,經常相約小朋友們一起玩耍,「有時仲一齊行山!」

性格鬼妹,育兒思想傳統

Danielle現階段無打算離開傷心地,與仔女搬來香港,一來剛經歷了家庭轉變,二來仔女在大馬就讀的國際學校生活開心,先完成課程再作打算,「暫時唔想再有大轉變,佢哋喺熟悉環境下最有安全感。」

大仔Benjamin與細女Sophia年紀僅相差21個月,但性格大不同,Benjamin性格比較放鬆,愛玩音樂尋找快樂,正在學校學習打鼓、彈琴;細女Sophia性格多言,經常發問:「點解會咁?你幾時返屋企?點解你着呢件衫?點解你個嘴紫色……」Danielle笑指兩人是buddies,但有時會鬧大交,自己不會插手,「我會叫佢哋自己解決,佢哋要學識解決問題,除非遇到危險情況我先會出手。或者我會分開佢哋兩個冷靜一下,之後叫佢哋講番問題出嚟,同對方講sorry。」

身為混血兒的她性格「鬼妹」,但育兒思想比較傳統,要求仔女學中文,自己亦身教禮貌、規矩及做人應有態度。「一定要對人講Thank you、please、excuse me,對人體貼有禮,呢方面我係比較Asian,哈哈。」

廚房教育要相信孩子

入得廚房,出得廳堂的Danielle,自小受父母影響愛上入廚,中國籍媽咪最擅長炒飯、煲湯等中菜;愛爾蘭父親則愛煮「鬼佬」菜式,Danielle自 小食得國際化。「我爸爸對講究飲食習慣,每餐一定要有菜、未食完飯唔准離開餐枱;媽咪就鍾意準備好多食物,以表達對我哋嘅愛。所以父母嘅飲食哲學深深影響 我,到我做咗媽媽之後都想好好餵養我嘅小朋友,包括搵好食材、設計均衡飲食、吸收足夠營養。」

為培養小朋友多食蔬菜的習慣,Danielle絞盡腦汁設計菜式,仔女喜歡食炒飯,就弄雜菜炒飯,加入五彩繽紛的蔬菜,少油少鹽,可再加少許煙肉,令味道更香口;她並在家實行Meatless Monday(無肉星期一),令仔女多嘗素食的滋味。她強調不能強迫孩子進食,不如多讓他們選擇,令他們食得更投入,「你想食西蘭花定菠菜?魚蛋蔬菜炒飯定炒麵?雞肉定牛肉?佢哋覺得有份決定食乜就會好投入。」

廚房教育能促進親子關係,她希望仔女能享受入廚樂,不必怕危險,父母應該相信小朋友。「仔女兩歲我就俾佢哋入廚房,幫手攪拌、拔菜,只要同佢哋一齊就唔怕危險。我細個都係咁樣睇媽媽煮飯,而我媽媽就入廚睇婆婆,廚房教育可謂一代傳一代。」

素食生菜包(4至6人份量)

Danielle把傳統生菜包改良成素食生菜包,材料色彩繽紛,簡單易整,小朋友好鍾意用手包住來食,覺得好好玩!

材料

生菜 1個
紅蘿蔔 1個(切粒)
薑片 少量切碎
蒜片 少量切碎
紅蔥頭 1個
芹菜 1個
紅椒 半個
白蘑菇 4個(去莖)
粟米粒 半杯
芽菜 適量
蔥 1條
芫茜 2湯匙

調味料

油 2湯匙
生抽 2湯匙
糖 1茶匙
胡椒粉 半茶匙
麻油 半茶匙

步驟

1 將生菜頭切走,小心地將生菜逐瓣分開,將生菜片放入冷水中,並放入雪櫃浸一小時,然後取出隔水備用。

2 燒熱鑊、下油,加入薑片、蒜片、紅蔥頭略炒,再加入芹菜、紅蘿蔔、紅椒、白蘑菇、粟米粒炒約1分鐘。加入生抽、糖、胡椒粉、麻油再炒2分鐘。最後拌入芽菜、芫茜、蔥。

3 將(2)加入生菜中。

完成!