雞年

「蜘蛛媽媽」 鄭麗莎 三胞猴B迎 雞年

育兒

廣告

前包山后、人稱「蜘蛛媽媽」的 鄭麗莎 (Lisa )一直夢想生六個,兩年前她與丈夫希望誕下「馬騮仔」,按醫生指示吃排卵藥,意外地懷上三胞胎,雖然懷孕有風險,但Lisa不欲扼殺小生命,亦相信自己有運動員的體魄及歷練支撐,決定冒險保胎,最終三胞胎「蛛BBB」汪晉孝(Jeremy,乳名Mimi)、汪尤霏(Euphy )和汪尤嘉(Yuka )順利出世,分別重2.08磅、1.688磅及1.74磅,現已五個月大,增磅至11至16磅,以大孖Mimi最重手,比起妹妹大一個碼,甚至比晉晉同齡時還要重。一下子連生貴子,今個 雞年 一家人變得特別熱鬧,連Lisa老公的妹妹上月又誕B,兩家人非常熱鬧。Lisa指上一代的親戚不算多,反而下一代多,最開心是老爺奶奶和她的父母,抱孫抱到手軟。新年「蛛BBB」主要留在家中迎賓,外出探訪的機會只留給長輩。

撰文: Ling
攝影: Simpson Chiu(部分相片由受訪者提供)
化妝: King Yip@KINGS MAKEUP
髮型: Louis@KINGS MAKEUP

 

三胞胎外形不同

多胞胎外形大多很相似,但「蛛BBB」好易分辨,大孖仔Mimi身形大一個碼,但頭髮最少;細孖女Yuka就最多頭髮,而比較平均的就是二孖女Euphy。三胞胎外形有點不一樣,連性格都不同,先他們出世不久,Lisa已察覺大孖Mimi比較愛笑,見到陌生人都識笑;Yuka則是辣椒仔,飲完奶會高八度尖叫;Euphy就較文靜,愛眼仔碌碌。他們暫多留在家中,甚少外出,Lisa指他們一出街會好大陣仗,「佢哋除咗去健康院之外,都好少去其他地方,等佢哋大少少先,依家就focus番喺哥哥晉晉度,星期六日帶佢去婆婆同嫲嫲屋企,有時就帶佢去公園同郊外玩。」返回家中,Lisa多與三胞胎說話、聽聽音樂,盡量分配好給予四個小朋友的時間。

收四封利是 回贈親朋要大封

過年期間,三胞胎也不會四出拜年,最多只去長輩屋企探望,但Lisa會準備多些大利是作補償。「因為人哋探我要俾四封利是,唔係幾好意思,所以我會封番大封啲俾人,同埋準備多啲賀年食品同糖果招呼人。」Lisa的親友們已經排住隊上門探三胞胎,齊齊祝福BBB快高長大,身體健康。Lisa重視拜年禮儀,平時入屋叫人,拜年就恭喜人,三胞胎留家休息,晉晉就負責代表四兄弟姊妹出去拜年,Lisa笑說小朋友要人見人愛,已四出搜羅應節靚衫,並教定晉晉講:「恭喜發財!」

年初二合家行山

Lisa是前攀石及健美運動員,性格周身郁無時停,懷孕時為安全起見減低運動量,產後她急不及待復出,盡快操fit自己去應付有關運動的工作,包括跑步、打跆拳、健身和在家中進行簡單運動。「我時刻提醒自己要有良好體態,我有呢個意識就算喺屋企都做到運動。有時我會揹住晉晉出去行一兩個鐘,已經出到一身汗,佢又可以放電周圍睇嘢。如果BB瞓晒覺,見情況OK我會出去跑幾個圈。」

Lisa與丈夫皆熱衷運動,晉晉都有遺傳好動因子,兩母子一齊做運動放電最啱,「湊放學我同佢成日拖住手大叫:1、2、3,Run!一齊跑跑跑!或者帶佢去公園爬來爬去捉衣因,乜都玩一餐!」

過年期間,Lisa都不忘運動,每逢年初二習慣與家人一齊行山,今年她打算帶晉晉初試行山滋味。「行山係一個好好嘅gathering,我屋企都好鍾意呢種運動,我會準備定孭帶帶晉晉行山。」有小朋友1歲半征服龍脊,2歲半的晉晉是行山初哥,Lisa考慮先帶晉晉征服大澳,行完有美食歎,是親子行山好去處。

產前運動比產後重要

Lisa在產前產後均保持身形纖瘦,產後看落更實淨了,慢慢回復運動員的體格,她指產前運動比產後更重要。「因為產前打好個底子,令身體有啲肌肉,可以加快新陳代謝同血液循環,避免懷孕期間出現腰骨痛及水腫,產後亦唔會暴肥。」只要落手落腳湊孩子,媽咪肥極有限,「BB都開始坐唔定,鍾意扭抱,我喺屋企都要東奔西走。」
至於令她成名的搶包山運動,Lisa暫不考慮復出參加,因要付出大量心血去訓練,自己未有時間應付。「我始終贏過,如果我再玩要有好好嘅狀態,暫時我要投放時間照顧小朋友先,轉玩吓其他比賽,由低開始壓力冇咁大。最近我玩緊跆拳道,依家目標係參加全港女子賽,希望將來同晉晉一齊參與,連先生都鍾意,可以發展成家庭運動。」

目標生夠六個

Lisa首次懷孕曾揚言,要生夠半打!已適應忙湊四個小孩的生活,生六個的目標有機會達成,「我見依家都開始搞得掂,可能生多兩個都得。」生仔容易教仔難,但Lisa覺得做人不應有太多顧慮,而作為一個運動員,每次接觸新的運動也充滿挑戰和困難,只要正面面對事情,最後成功又有一番景象。「只要保持正面心態,總有辦法解決。諗得太複雜就一定唔會再生,生又好教又好,諗得100%負面就唔會行動。我以前生活環境唔係富裕,我父母都係天生天養、窮有窮養。不過就算再生,我都會等三胞胎兩至三歲,行得走得、自己食到飯我先再諗。」

不過有媽咪質疑,有錢可以請工人姐姐湊,生幾多個都得,Lisa不諱言為了三胞胎新請兩個姐姐,現家中有三個姐姐幫手,主要家務和分擔湊B壓力,自己都有落手落腳湊。即使有能力請,都不一定請得好,Lisa也遇過表現不理想的姐姐,最後請她離開。「姐姐主要幫手照顧日間嘅事,夜晚就係我做,BB未戒夜奶,我要校定鬧鐘半夜起身餵三個。其實每人有自己生活方式,請到信得過嘅姐姐係好事,請得唔好要監佢做嘢都麻煩,自己要睇緊啲。工人姐姐可以分擔壓力,自己亦可以抽身做吓工作,有番少少私人時間都係一件好事,睇吓自己有冇能力負擔到。」

無能力做怪獸家長

縱使照顧四個小朋友忙到一頭煙,經常睡不夠四小時,但Lisa仍覺得忙得好開心,「等BB戒咗夜奶,過咗呢段時間應該瞓得好啲。」雖然如此, Lisa仍未打算做全職媽媽,產後不久已復工出席大小活動,被質疑會否疏忽照顧孩子,熱愛工作的她覺得需要有工作平衡生活。「我都要賺錢先有能力養起佢哋,做媽咪要取捨家庭同工作,但我兩樣都鍾意,有時工作令我叉足電,返嚟可以好精神對住佢哋,所以我覺得平衡到就OK,而且我嘅工作比較彈性,可以自己安排schedule,我會盡量將工作擺喺下午,夜晚就照顧小朋友。」能夠照顧好四個小朋友,已經是Lisa目前最大的心願,她笑言自己沒有條件做「四個小孩的怪獸家長」,根本無時間督促四個學習十八般武藝,所以她會讓孩子走開心學習的路線,培養做運動興趣,期待一家人集體強身健體!

全文完