全職媽媽 去見工

全職媽媽 去見工

「歡迎家庭主婦兼職」、「薪優良準」!上個月睇到某公司招聘廣告咁樣寫,吸引咗 全職媽媽 嘅茄蛋媽應徵,尋日就去見工,希望搵d細藝,賺d駛費之餘亦希望重新執筆,點知工見唔成,反而識咗個朋友……

全職媽媽搵工

自從茄蛋媽做咗全職湊仔婆後,生活真係好厭悶,成日都覺得自己不事生產,對於返開工嘅媽媽黎講,轉為全職媽媽後嘅生活真係翻天覆地轉變,總括呢八個幾月嘅 全職媽媽 生活得出以下睇法:
–>對住一個無糧出比你,只會以喊嚟話你知佢想點嘅老細!
–>呢個老細喜怒無常,有時會喊到隻狗咁令你精神衰弱,有時笑到癲咗令你會心微笑。
–>有時夜晚瞓覺一個鐘喊醒一次非要你抱住佢都唔收聲,有時又一覺瞓天光令你半夜嚇醒睇下佢仲有無呼吸。
–>有時一啖都唔食你為佢準備嘅九大簋,有時又一口氣隊你兩碗令你頓覺自己係美女廚神。

茄蛋仔乜都唔食
IMG_6420

IMG_6423

7×24無例休無假放嘅日子就咁過咗八個月,日夜疲勞轟炸情緒瀕臨失控。作為一個超級無耐性嘅人嚟講,茄蛋媽每日都過住幾乎精神分裂嘅日子,幾多次幾乎失控狂喊只係因為蛋仔半夜喊醒,幾多次瘋狂大叫只因為蛋仔食食下飯發晒癲地大喊吐晒茄蛋媽為佢整嘅九大簋。

不過,講到尾,最現實嘅問題係:無錢! 全職媽媽 月底唔會有糧出,年尾唔會有花紅,除咗駛下積蓄,就要由蛋爸安排喇,但原來開口問人攞錢感覺唔太好受,唔知其他媽媽係點樣面對呢個問題呢?

不過,做得 全職媽媽 又真係要湊仔,搵咩做喎,只能搵兼職或者freelance囉,最好時間彈性、在家工作啦,對於係求職網上寫住「神秘人」、「工作時間自由」之類嘅字眼,相信好多全職媽媽都同茄多媽一樣唔會錯過click入去昅下乜料。

IMG_6430

同一般見工一樣,填表後就坐定定等面試,面試嘅係一位女士,佢一開波就好詳細地講解呢個職位要做乜,原來一切都唔係茄蛋媽所諗咁樣,細問之下原來間公司並唔係請兼職架,相反係請人返去打仗。嘩,咁茄蛋媽當然耍手擰頭啦,反問佢請我做freelancer啦,失敗收場。

呢位面試嘅係廣告界前輩,佢真係唔話得,言談間發現佢唔止對工作好有heart,仲對人好有heart,知我因為要湊仔而反建議我好好enjoy 呢三兩年,好多謝佢比我嘅建議,最後我地仲交換埋電話用Whatsapp保持聯絡做朋友,呢趟見唔成工之旅反而識咗個朋友真係比搵到份工更加寶貴。

全職媽媽搵工真係好多顧慮,前輩話:「打工仔,無非為錢,如非財困到走頭無路,不如好好珍惜呢兩年同bb嘅生活,過咗就無」,佢講嘅有佢嘅道理,但茄蛋媽諗遠少少,覺得一切都要等天時地利,茄蛋媽等待中……

IMG_6424


 

更多精選內容