一年冇假放 捱到虛脫 王浩信 硬撐湊女

一年冇假放 捱到虛脫 王浩信 硬撐湊女

王浩信 有兩個情人,一個係今世老婆YoYo陳自瑤,另一個係前世情人 ─ 5歲的寶貝女QQ王靖喬。自從爆紅升呢上一線, 王浩信 劇接劇,又頻頻出埠拍外景及宣傳,可謂有家顧不得。除了冇時間陪妻女,造人大計無期,就連承諾每年暑假的親子遊都未能兌現。日前YoYo離港工作,到 王浩信 做湊女公陪囡囡去公園踩單車,難得兩父女獨處, 王浩信 為盡力彌補,幾攰都硬撐到底,陪玩陪笑滿載溫馨!

原文:東方新地

相片:節目截圖,新傳媒資料室

王浩信 人氣大爆發

34歲的 王浩信 去年憑劇集《EU超時任務》中「渠頭」一角彈起,一度被網民捧成視帝大熱,雖然最後只與同劇的朱千雪在台慶頒獎禮中獲「最受歡迎劇集搭檔」獎,但人氣急升演技亦備受肯定。受無綫力捧的王浩信劇接劇,拍劇工在作日夜癲倒,再加上大量的商業活動及宣傳活動,搞到成年都冇放過假。

 

 

上月去完葡萄牙拍重頭劇《溏心風暴3》後, 王浩信 返港後繼續工作,日前又飛去北京攞獎。忙到有氣無碇抖,王浩信接受訪問時直言過去一年長時間缺乏休息:「去年至今拍咗《不憧撒嬌的女人》、《踩過界》同《溏心風暴3》,我已經同公司講真係要抖一抖,呢一年加埋嘅假期得三日,但嗰三日都要準備第二日嘅劇本,根本唔算真正放假,去年撞完車,我嘅身體狀況差咗好多,日夜顛倒咁拍劇每日平均要開廿幾個鐘,我真係體能有限。」

 

王浩信 囡囡 溫馨做運動

王浩信 早前難得有一日假,老婆YoYo卻要出埠工作,於是湊女責任落在他身上,兩父女去到將軍澳寓所附近的公園做運動!當日太陽曬正頭頂,QQ大汗淋漓盡,幸好有個體貼爸爸左手拎毛巾、右手拎水樽,一停低就埋身抹汗餵水。現埸所見,每次QQ因為太熱太辛苦而撒嬌,王浩信都有方法氹番個女笑,踩咗個幾小時單車,兩父女手拖手步行返家,睇得出QQ好黐爸爸,二人都很珍惜共渡的時光。

暖男王浩信在囡囡面前變身成慈父,幫囡囡推單車邊行邊對望甜笑,行到終點又開心擊掌,邊個角度睇都係咁溫馨!

 

阿女踩車阿爸跑步,兩父女非常合拍。

 

炎炎夏日踩單車,QQ曬到溶,王浩信手巾同水樽不離手,只要囡囡一停低,阿爸即自動波埋位抹汗,體貼入微。

 

 

王浩信 :為頭家幾辛苦都值得!

連月忙拍劇, 王浩信 呢日終於抽到時間去做gym,見他在私人教練指導下主攻器械,操練上半身的肌肉。期間王浩信發現記者在場,他大方地打招呼,見教練拿出一罐奶粉給他沖水飲,他說是蛋白奶粉,是大隻佬操肌的必需品。

 

 

被問到會唔會覺得工作同家庭好難平衡, 王浩信 表示:「作為家庭支柱,照顧屋企係我嘅責任,盡量想抽多啲時間畀屋企人,囡囡嘅成長更加唔可以錯過。我唔抗拒工作,努力咗咁多年,終於有啲成績,我會想繼續向前,同時亦想盡量抽時間畀太太同個女,為咗佢哋,幾辛苦都值得!」如果真係再追多個,YoYo會唔會退出幕前做全職媽媽? 王浩信稱:「其實依家財政上我完全負擔得到,佢已經可以唔使做。不過YoYo鍾意演戲,我亦好尊重佢嘅選擇,到時生多個佢專注湊小朋友都ok嘅!」

 

造人大計無期

近年 王浩信 與YoYo不止一次向外表示有計劃再生多個,不過二人的工作與作息時間似乎未能配合,所以至今仍未有好消息。其實 王浩信 與 YoYo輪住飛,再加上要照顧QQ,唔好話造人,兩公婆撐枱腳二人世界嘅時間都唔多。據知嚟緊公司幫王浩信接了唔少賺錢騷,年尾又有頒獎禮同台慶,他希望可以賺多啲,等太太可以唔使做,專心湊小朋友!王浩信目標明確,暖男唔係得個講字,拍晒心口話用行動證明,呢啲好老公去邊度搵?

 

 

2011年王浩信與YoYo奉女成婚,囡囡出世後完全俘虜爸爸心,王浩信曾表示只要抱住女兒就很快能入睡。

全文完

更多精選內容