麻雀樂團6-10集劇情︱終於有打麻雀戲！譚俊彥演「變態阿叔」跟蹤親生女

《麻雀樂團》劇情曝光 譚俊彥跟蹤親生女郭柏妍

在《強人》系列金牌監製羅永賢的最新力作《麻雀樂團》中，譚俊彥飾演麻雀館第二代老闆司徒久，劇情講述他某天收到一隻神秘USB，裡面竟是一名小女孩用大提琴拉奏《Long Long Ago》的片段。司徒久被影片深深吸引，經過多番追查，驚覺片中的女孩原來是自己的親生女兒沈家明（郭柏妍飾）。然而，基於某些不為人知的原因，他無法與女兒相認，只能在暗中默默關注。他過度瘋狂的關懷方式，卻引發連串誤會，一度被當成是跟蹤少女的「變態中年阿叔」，鬧出不少笑話，角色極具挑戰性。

第六集 (08/04)：「司徒久真心定詭計？」

焦點：家明搬入司徒家，程朗同程晴覺得司徒久對家明好得離奇，懷疑佢有心追女！天才指揮家金孝成喺歐陽宗嘅安排下嚟港開騷，司徒久同張鐵為樂團搵指揮傷透腦筋，張鐵仲懷疑歐陽宗玩陰謀，但無奈要同佢談借人，仲要面對一場唔公平嘅麻雀局！家明嘅大提琴畀賊人搞亂，維修費貴到飛起，司徒久想幫手畀拒，唯有搵張威同駿強，帶家明去大龍鳳搞亂局！

第七集 (08/05)：「鬆章暗藏父女情：家明疑心四起」

焦點：家明同司徒久、駿強、張威一齊打麻雀，發現班友似有意「鬆章」幫佢贏錢修琴，仲懷疑司徒久對佢有意思！歐陽宗一邊阻張鐵去新加坡搵指揮，一邊用法律條文箍住孝成唔畀走。孝成喺程晴嘅快餐店開啤酒唔帶銀，畀程晴迫住喺鏡頭前認債！程朗幫家明攞大提琴去修，家明緊張到爆，兩人簽借據。張鐵搵指揮無進展，同司徒久等人商量對策，決定將計就計加入公會，攞歐陽宗開刀！

第八集 (08/06)：「樂團指揮出現 批評一文不值」

焦點：家明修好大提琴，用琴音答謝司徒久一家，勾起司徒久同沈盈嘅回憶。司徒久同張鐵首次見孝成，想用視像演奏說服佢做指揮，點知孝成批評樂團一文不值，但仍答應見樂手。張威發現駿強出賣司徒久，當面對質，駿強直認畀歐陽宗高價收買；司徒久表面笑笑口，內心苦不堪言。孝成狠批樂手，張鐵慷慨激昂反擊，保住樂團尊嚴！大龍鳳門外有人派利是搶客，司徒久同公會理論，歐陽宗竟提議「打盲章」！

第九集 (08/07)：「盲章決戰：樂團同大龍鳳生死鬥」

焦點：孝成因程晴用欠款片脅迫，無奈答應做指揮。「盲章」對決完場，歐陽宗開條件要入主大龍鳳，司徒久斷然拒絕，仲揚言派利是同佢硬碰！孝成首次帶港灣樂團練團，樂手表現麻麻，遠未達標。家明私下搵孝成，點知孝成直指樂手質素差，唔抱期望。家明雖然洩氣，仍鼓勵隊友。張鐵出計，透過張威搵大班人去搶對家派嘅利是，迫到對方停手！

第十集 (08/08)：「遲到挑機：司徒久硬撼歐陽宗」

焦點：司徒久故意遲到，向麻雀公會同歐陽宗示威！孝成三日冇現身樂團練團，程晴軟硬兼施說服，點知同孝成拉扯畀程朗撞見，程朗誤會佢哋拍拖，暗中盯緊孝成！張鐵暗地搵到三個幹事支持，想推司徒久選公會主席，挑戰歐陽宗霸權，但司徒久死都唔肯，氣到張鐵拂袖而去。張鐵病咗留家，歐陽宗突然上門，用德旺集團CEO嘅條件挖角，司徒久聞訊急急趕返屋企！

監製下令減女神味 李佳芯剪短髮演惡管家

這次李佳芯（Ali）亦會放下女神形象，為劇集帶來全新感覺。據悉，監製羅永賢為了讓她更貼合角色，特別要求她剪去一頭長髮，以更瀟灑率性的短髮造型示人，務求減少「女神味」。Ali在劇中飾演譚俊彥的貼身助理張鐵，性格猶如「管家婆」，經常要處理家庭會議中的大小紛爭，更會以三寸不爛之舌與專制的譚俊彥強勢對抗。而譚俊彥亦一改近年溫文專業的戲路，飾演表面粗魯、內心充滿愛的麻甩中佬。監製預告兩人這次合作絕對是「火花十足」，令人期待他們的對手戲。

金牌監製羅永賢揭秘 強調香港人情味

監製羅永賢受訪時透露，《麻雀樂團》的核心主題是「香港味」、「家庭」與「人情味」，希望帶給觀眾久違了的純親情劇集。他表示，劇中幾乎每一集都至少會有一場同枱食飯的戲份，藉此帶出「回家吃飯」對香港人的重要意義。羅永賢坦言：「希望大家睇呢套劇嘅時候，會覺得入面啲角色，會好似自己身邊成日遇到嘅人。」他更強調，「情」是許多無綫製作人創作的根基，無論是親情、愛情還是友情，「人同情始終係好重要嘅劇集元素」，期望透過這部溫情小品，再次觸動觀眾心弦。