微電影

母親節 微電影 – 《記得‧記得》製作花絮

article

廣告

就嚟到母親節,「學界男女神」嘅製作團隊又身痕想搵啲嘢搞喇!於是決定開拍第二部 微電影 ,而且仲可以請到金像影后 惠英紅 參與演出,絕對係極大嘅榮幸呀!另外,仲有舊年點擊率最高嗰條Ball片嘅男主角,真‧華仁仔潘朗峰(Ryan)飾演小紅姐嘅仔仔!而家嚟睇吓啲幕後花絮先啦!

拍喊戲當然難唔到小紅姐啦! 拍三次,三次個落淚位都一樣係咁準。相反Ryan就比較緊張,佢話因為冇諗過影后會喺佢面前喊,所以初初就唔識反應,不過小紅姐好好人呀,自己培養情緒之餘,亦都好有耐性咁教Ryan入戲。

戲中有唔少衝突嘅場口,拍嘅時候又要走位,又要講對白,所以拍之前,小紅姐就不斷同Ryan試戲,講到邊個字,就做咩動作,全部事前都排好哂,影后真係一啲架子都冇架!

舊年小紅姐拍咗一部叫《幸運是我》嘅電影(未上映),戲中佢就係飾演一個腦退化症病人,而現實生活中,小紅姐嘅媽媽都患有呢個病,所以佢對腦退化症嘅病人都特別關注。佢好希望觀眾睇完呢部 微電影 之後,可以了解到腦退化症唔係老人嘅專利,好多患者都係喺中年開始病發,所以要多啲關心屋企人,唔好只係一味嫌佢哋煩、同冇記性,及早發現,其實係可以減慢退化嘅速度!

Ryan演出經驗雖然唔多,但係都肯學肯做! 可能角色設定同佢本身都好貼近啦,尤其係佢駁阿媽嘴嗰場呀,駁嘴駁舌嘅反應快到呢! 連小紅姐都話想打佢呀!

除咗有影后有陣,今次呢部 微電影 都仲有一個大突破架! 係咩呢!? 就係有一首原創嘅主題曲喇! 創作班底來頭都好大架!(多謝女神周霏霏幫忙牽線!!!) 好似有第三季中國好聲音嘅香港區冠軍-劉卓軒包辦曲詞編啦,仲有曾經參與《狂舞派》音樂創作,同多位歌手合作過嘅混音師 – Hugo Lee@ThreeOsix,負責Mixing同監制,仲有我哋其中一位男神 – 鄧思朗(Oscar)負責主唱部分,首歌配合埋畫面,其實真係幾感動架! 希望大家睇片嘅時候,都可以留意吓啦!

製作特輯

[youtube id=”5oyylLwth5U”]

重溫完整版

[youtube id=”U7Q4n0P_luc”]

主演:惠英紅 Kara Wai

主演:潘朗峰 RP

演出:周霏霏Feifei Chau

 

主題曲“無言無語”

音樂監制:Hugo Lee 、Feifei Chau

詞、曲: 劉卓軒Hinry Lau

編: Hugo Lee @ThreeOsix、劉卓軒Hinry Lau

Mixing: Hugo Lee @ThreeOsix

主唱:鄧思朗Oscar Tang

 

編導及統籌:Joanne So

導演及攝影:Anthony Leong

攝影:Carson Au

劇照:Clay Lam

剪接: Candy Chen

平面設計: KS

化妝及髮型:Emma & Jeffery@EM Makeup

造型:Wong Peggy

協力: Edison Chan、KT.Chiu

 

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。