飛常日誌︱劉穎鏇戴祖儀變身航空小花 都唔夠呢位真空姐搶鏡！

郭柏妍、戴祖儀、劉穎鏇輪流上演「制服誘惑」

今次女角陣容有高海寧、蔡思貝、劉穎鏇、郭柏妍及戴祖儀等，幾位小花上演「制服誘惑」，戴祖儀更穿上空姐服，大騷煞食長腿再加黑絲。至於女主角蔡思貝就不是以空姐服現身了，打扮比較似機管局人員。

劉穎鏇自爆鐘意睇《衝上雲霄》

劉穎鏇同樣以空姐造型現身，她表示扮演空姐非常開心，因細細個就很鐘意睇劇集《衝上雲霄》，亦幻想過有否機會扮空姐，但今次拍劇要控制飲食keep fit。

16年港姐蘇可欣索爆空姐造型好搶鏡！

不過，講到航空劇，當然不乏空少空姐，其中仲有一位係入行前是空姐的落選港姐蘇可欣，今次「重操故業」，非常有型有款！蘇可欣2010年於大埔救恩書院中五畢業，在學校時活躍於校際田徑比賽，其後修讀文憑，選港姐前曾為香港航空的空中服務員，她在社交媒體分享地勤造型並留言：

「終於都可以同大家分享~ 唔係我返左去飛呀 係入左劇組至真 機場每一角落都充滿回憶。」

蘇可欣與圈外有米男友拍拖

蘇可欣在2016年參加港姐，可惜在20強止步，但仍獲TVB簽約，其後憑《3日2夜》大騷出眾身材，她亦有加入娛樂新聞台擔任主持，並於2018年曾因訪問《出貓特攻隊》泰國演員Nonkul（賓爺）而發展姊弟戀，不過維持一年半分手收場。其後，蘇可欣便在2020年公開與圈外有米男友拍拖，幸福享受富貴生活，又經常四圍飛，兼大晒名牌手袋，據知現時居於跑馬地豪宅。

以航空業為題材嘅新劇《飛常日誌》呢日喺機場舉行開機儀式，台前幕後齊齊現身切燒豬，場面熱鬧。參演過兩輯《衝上雲霄》系列嘅馬國明，今次就唔再做機師，轉演機場中央控制中心值班經理指揮飛機升降。而蔡思貝除咗演馬明前妻外，亦係一名航空公司駐機場主管。 對於拍攝時可以深入機場重地，馬明就話相當震撼，仲話好多地方之前拍《衝上雲霄》時都未曾去過，亦因為拍呢套劇先令佢了解到，原來要有咁多人，先可以令機場運作順利。

陳豪喺新劇入面就飾演機管局主席，佢笑言做唔到機師，劇組唯有畀個高啲嘅職位自己。阿Mo話以觀眾嘅角度出發，會好想知一個機場係回運作，所以呢套劇應該可以滿足大家嘅期待。喺劇中演停機坪主管嘅徐榮，就話拍呢套劇先知停機坪原來有好多電車叉電位。

吳偉豪現實中嘅哥哥係一名機師，而今次喺劇中佢就飾演就讀航空學校嘅年青人，佢話現實中哥哥都曾經讀過，所以遇到有咩唔明嘅地方，都會請教對方呀。

今次飾演機場客運服務主任嘅高海寧，就大爆演機場保安總保安主任嘅洪永城相當就入型入格，唔只成日畀機場員工誤認係同事，仲有唔少途人向佢問路。提到高ling早前上載嘅旅行靚相中，有一位小鮮肉同行，令大家以為佢有新戀情，但高ling就澄清呢位小鮮肉係佢嘅表弟，仲話嚟緊表弟會成日出現㗎，所以大家唔駛再亂估喇。