白色強人

【白色強人】姜大衛與妻相愛45年 𢹂手走過抗癌路

娛樂

廣告

最近TVB電視劇白色強人》已經播放到第3個星期,劇中陣容鼎盛,好評如潮,不少人都有追看郭晉安姜大衛的「醫改」爭鬥,簡直叫人緊張!姜大衛(John哥)入行超過60年,他跟太太李琳琳結婚45年,一直是圈中出名的模範夫妻,早年更陪伴太太走過抗癌之路,兩夫妻感情更勝從前!

撰文:Kammy|圖片來源:姜大衛微博節目截圖

白色強人》與郭晉安大鬥演技

醫改方案可謂是《白色強人》的重心主題,劇中飾演明成北醫院院長呂仲學的姜大衛,更與郭晉安展開權力鬥爭,他亦曾以病人的安危來,甚至要求郭晉安封刀來脅對方就範。不過,姜大衛在劇中因患上肺癌,要馬國明與郭晉安聯手動手術去切除腫瘤,但姜大衛因手術期間感染腦膜炎,令他一度陷入昏迷。

姜大衛李琳琳結婚45年 攜手走過抗癌路

現年71歲的姜大衛同太太李琳琳於1974年結婚,育有兩女一仔,大女姜依蘭07年嫁曹永廉,二女姜依文亦已組織家庭,現居溫哥華,細仔姜卓文是李琳琳於1995年以48歲高齡誕下,現年僅23歲。2011年中李琳琳被爆患上大腸癌,手術後卻因癌細胞擴散至淋巴位置,要進行化療,被傳媒影到激瘦如同紙版人,不過經過老公姜大衛悉心照料,兩年後李琳琳終於戰勝病魔,兩公婆感情更勝從前,John哥早年接受傳媒訪問時表示:「嗰段時間我的確係好擔心,唯一可以做嘅就係共同面對。四十幾年感情,其實唔需要講出聲都知,大家都係冇咗對方唔得嘅!」

婚姻之道 互相包容

講到45年婚姻相處之道,姜大衛認為最重要係互相包容,佢話自己年輕時好多事情都會堅持己見,睇唔順眼就會出聲,但隨住年長的看法也有所不同:「之後會明白其實好多執拗都冇乜大不了,總之唔傷害到自己同別人就得啦。兩公婆嗌交,都係因為睇法唔同。後生時,我哋總係想改變對方,但慢慢就會知道,有啲嘢係冇得迫嘅!」

細仔入圍《全民造星II》姜大衛為子打氣

ViuTV今年推出全新一輯《全民造星II》,日前ViuTV在公佈96位入圍參賽者名單及造型照,出生演藝世家嘅姜卓文除了父母姜大衛、李琳琳都是演藝界外,祖父嚴化(姜克琪)、叔伯秦沛、爾冬陞、家姐姜依蘭、姐夫曹永廉、堂兄姜文杰和堂姊姜麗文都係圈中人,真係超級星二代!而佢喺自我介紹嘅專長一欄中,寫上演戲,唱歌,Rap,真係拭目以待!John哥話最初唔知道個仔參加咗《全民造星II》,係卓文參加後才告知,John哥話對囝囝都好有信心,希望佢可以入到50強,不過輸贏唔係最緊要,最重要係攞人生經驗,John哥話希望條路係由兒子行出來,而唔係一出嚟畀人話「佢係姜大衛個仔。」真係愛子心切!

ViuTV周一晚開始在網上舉行「Eye Catching Idol」選舉,5位最多心心嘅《全民造星II》參加者可直入次回合60強,姜大衛與太太李琳琳話佢哋已經畀咗心心支持囝囝,仲希望大家多多支持細John,真係廿四孝好爸爸!

孻仔孻心肝,加上老來得子,老婆李琳琳95年以48歲高齡誕下孻仔姜卓文,同大女依蘭年齡足足相差21年,二女依文亦相差9年,所以John哥好錫卓文。

 

John哥細仔卓文原來對演戲唱歌都有興趣,更視爸爸為學習對象。據知情者透露,「卓文細細個已經對做戲好有興趣,成日問爸爸做戲啲嘢,John哥都好鍾意同個仔分享自己經驗,佢畀好大自由度個仔,但就講明要佢讀完大學先諗去向,而卓文都好乖仔,好畀心機讀書,去年就大學畢業。」據知情者透露:「因為年齡相差咁遠,家姐依蘭好錫細佬,嗰時爹哋媽咪好忙,依蘭就幫手湊細佬,所以卓文好尊重呢個家姐,亦同姐夫曹永廉好friend ,佢成日都同兩個姪仔姪女玩,掉番轉睇住家姐兩個仔女大。」

青靚白淨

眨吓眼卓文已經23歲,長得高過爸爸,而且生得青靚白淨,似足韓仔feel,同爸爸以前個大俠Look好唔同,好啱呢個年代發展,呢啲外形好煞食。去年大學畢業的姜卓文,之前秘密去試鏡,John哥接受訪問時曾透露:「個仔想做明星,我哋唔會阻止,佢之前去咗試鏡,未知結果,要我帶佢入行好易,但我想佢靠自己。」

姜大衛對女婿讚不絕口

早幾年John哥同女婿曹永廉喺《公公出宮》同《超時空男臣》密密合作,《公公出宮》中曹永廉更同現實一樣,都係扮演John哥嘅女婿角色,成就曹永廉攞到最佳男配角獎。John哥對女婿大讚話:「佢個角色唔容易演,但佢演得到!」至於拍戲時,廉記又會點樣稱呼John哥?John哥笑指以前會同佢講喺錄影廠要叫John哥,唔好叫外父!但廉記就笑言依家叫咩都冇所謂啦!

演藝世家出身

姜大衛係演藝世家出身,與大哥秦沛及同母異父弟弟爾冬升三兄弟感情勁好,John哥自4歲開始做童星,66年加入邵氏做武師,得到大導演張徹賞識,擔正《游俠兒》主角。70年更憑《報仇》一片成為香港首位獲得亞洲影展最佳男主角嘅演員。73 年,John哥再憑電影《叛逆》獲得亞洲影展最具性格演員獎。

愛拍搞笑武俠劇

姜大衛曾表示最鍾意演武俠片,除此之外就係喜劇,早前《翻生武林》就集合晒John哥最鍾意嘅兩種類型,劇中John哥一人飾演「慈悲老人任我飛」和「武林盟主慕容風」兩個角色,戲份勁重。

姜大衛童星出身

出身演藝世家的姜大衛童星出身,在1959年經典黃梅調電影江中,與哥哥秦沛及妹妹嚴慧兄妹檔於街上唱戲恥笑未婚產子的林黛。

71年24歲一臉稚氣

77年30歲浪蕩不羈

30歲嘅John哥,一身白色綁帶開胸衫,為佢平添一份瀟洒又浪蕩不羈感覺。

70年《報仇》封亞太影帝

電影《報仇》中John哥ending直搗黃龍一個殺幾十個,最後手刃殺兄(狄龍)仇人後,一身白色中山裝染滿鮮血死去,痛快悲壯嘅演出為佢贏得第16屆《亞洲影展》(後改名亞太影展)「最佳男主角」,成香港首位亞洲影帝。

73年《叛逆》奪性格演員獎

有時笑起嚟有種邪魅feel嘅John哥,演同陳美齡相愛嘅富家子,兩人同為理想、愛情離家出走,充滿叛逆感嘅演出為佢獲頒第19屆《亞洲影展》「最具性格演員」獎。

銀幕最佳拍檔狄龍

姜大衛同狄龍自69年《死角》首次合作後,俾邵氏打造成兄弟檔,一個狂傲叛逆、一個老實正直,呢對炙手可熱當紅巨星CP合作無間,見證邵氏電影黃金年代,兩人同住一宿舍生活整整六年,戲內戲外都形影不離。

《刺馬》最經典合作

73年電影《刺馬》中,狄龍因勾義嫂加上沉迷功名利祿同結拜兄弟姜大衛、陳觀泰反目,John為報殺義兄同奪妻之仇,混入軍中將已官拜兩江總督嘅狄龍擊殺,場面蒼涼悲壯俾奉為經典,07年重拍成《投名狀》。

78年照顧弟弟爾冬陞

爾冬陞係秦沛同姜大衛嘅同母異父弟弟,77年入行第三部電影《三少爺的劍》就做男一,同公司John哥對當年19歲嘅弟弟爾冬陞照顧有加,盡做哥哥嘅責任。

撐弟客串《三少爺的劍》

姜大衛為撐弟客串楚原執導嘅《三少爺的劍》演慕容金龍一角,片中俾妹妹利用去殺演三少爺謝曉峰嘅爾冬陞、同凌雲演嘅燕十三。

*電視代表作*

80年麗的《大內群英》

80年姜大衛首拍電視劇,喺麗的電視(亞視前身)清裝武俠劇《大內群英》(獲選馬來西亞傳媒界二十世紀華語電視劇集100強第11名),演文武雙全、足智多謀、重情重義嘅曾靜,演得光芒四射,喺98年無綫劇集《乾隆大帝》再演曾靜。

94年無綫《再見亦是老婆》

93年姜大衛加盟無綫,翌年劇集《再見亦是老婆》做男一,演嘅于禮和因美艶女星投懷送抱搞婚外情而抛棄家庭,後嚟浪子回頭氹番肥師奶老婆陳秀雯,劇集大受歡迎,令兩人人氣急升。